ကျွန်တော်တို့ ဖုန်းသစ်တစ်လုံး ဝယ်ပြီးပြီဆိုတာနဲ့ အရင်ဆုံး ခေါင်းထဲရောက်လာတဲ့ စိုးရိမ်စိတ်က “ဘက်ထရီ” ကိစ္စပါပဲ။ လူကြီးတွေ ပြောပြောနေတဲ့ “အားသွင်းနေတုန်း ဖုန်းမသုံးနဲ့၊ စက်ကွဲလိမ့်မယ်” ဆိုတာမျိုးတွေ၊ “Fast Charging နဲ့သွင်းရင် ဘက်ထရီ ပွမြန်တယ်” ဆိုတာမျိုးတွေကို မကြာခဏ ကြားဖူးကြမှာပါ။

တကယ်တော့ ဒီအယူအဆတွေက ခေတ်ဟောင်း ဖုန်းတွေတုန်းကတော့ မှန်ကောင်းမှန်ပါလိမ့်မယ်။ ဒါပေမဲ့ နည်းပညာတွေ အရမ်းတိုးတက်လာတဲ့ ဒီဘက်ခေတ်မှာတော့ ဒါတွေက စိတ်ပူစရာ မဟုတ်တော့ပါဘူး။ နည်းပညာ Reviewer တွေရဲ့ လက်တွေ့စမ်းသပ်ချက်တွေနဲ့ MKBHD လို Tech YouTuber တွေရဲ့ ရှင်းပြချက်တွေကို ပေါင်းစပ်ပြီး အမှန်တရားကို ရှင်းပြချင်ပါတယ်။

Fast Charging က ဘက်ထရီအတွက် လူသတ်ကောင် မဟုတ်ပါ

အခုနောက်ပိုင်း ဖုန်းတွေမှာ 65W, 100W, 120W ဆိုပြီး အားဝင်နှုန်းတွေ အပြိုင်အဆိုင် မြင့်လာကြတယ်။ ဒီတော့ “ဒီလောက် လျှပ်စစ်စီးဆင်းမှု မြန်ရင် ဘက်ထရီတော့ ခံမှာမဟုတ်ဘူး” လို့ ထင်စရာရှိပါတယ်။ ဒါပေမဲ့ စိတ်မပူပါနဲ့။

ဖုန်းတစ်လုံးနဲ့ Charger ခေါင်း ချိတ်လိုက်တာနဲ့ သူတို့နှစ်ခုက အရင်ဆုံး “ညှိနှိုင်း (Handshake)” ကြပါတယ်။

ဖုန်းက “ငါက 20W ပဲ လက်ခံနိုင်တယ်နော်” လို့ ပြောရင်၊ Charger က 100W အားသွင်းခေါင်း ဖြစ်နေပါစေ… 20W ပဲ လွှတ်ပေးပါတယ်။ ဒါကြောင့် Watt များတဲ့ ခေါင်းနဲ့သွင်းလို့ ဖုန်းလောင်သွားတာမျိုး မဖြစ်နိုင်ပါဘူး။

နောက်တစ်ချက်က “ရေမြှုပ် သဘောတရား” ပါ။ လစ်သီယမ် ဘက်ထရီတွေက အဆင့် (၂) ဆင့်နဲ့ အလုပ်လုပ်ပါတယ်။

0% ကနေ 80% ထိက ရေမြှုပ်ခြောက်တစ်ခု ရေစုပ်သလိုမျိုး လျှပ်စစ်ကို အမြန်ဆုံး စီးဆင်းစေပါတယ်။ (ဒါက Fast Charging ပါ)

80% ကျော်သွားရင် တော့ ဘက်ထရီပြည့်ခါနီးပြီမို့ လျှပ်စစ်စီးဆင်းမှုကို တဖြည်းဖြည်း လျှော့ချပြီး ဖြည်းဖြည်းချင်းပဲ သွင်းပေးပါတယ်။ ဒါက ဘက်ထရီကို ကာကွယ်ပေးတဲ့ စနစ်ပါပဲ။

သုံးရင်း အားသွင်းရင် ဖုန်းပျက်တတ်သလား?

ဒါကလည်း အယူအဆအမှား တစ်ခုပါပဲ။ တကယ်တမ်း စမ်းသပ်ချက်တွေအရ ဖုန်းသုံးရင်း အားသွင်းတာက ဘက်ထရီ Health ကို ကြီးကြီးမားမား မထိခိုက်စေပါဘူး။

ဖုန်းသုံးရင်း အားသွင်းတဲ့အခါ ဖုန်းက ဝင်လာတဲ့ စွမ်းအင်ကို ခွဲဝေသုံးစွဲလိုက်ပါတယ်။ အဓိက System Run ဖို့အတွက် လိုအပ်တဲ့ မီးအားကို ယူသုံးပြီး၊ ပိုနေတဲ့ စွမ်းအင်ကိုမှ ဘက်ထရီထဲ ဖြည့်ပေးတာပါ။ ဒါကြောင့် သုံးရင်း အားသွင်းတဲ့အခါ အားဝင်တာ နည်းနည်းနှေးသွားနိုင်ပေမဲ့ ဘက်ထရီကို ဒုက္ခမပေးပါဘူး။ စမ်းသပ်ချက်တွေအရ ပုံမှန်အားသွင်းသူနဲ့ သုံးရင်းအားသွင်းသူတွေကြားမှာ Battery Health ကျဆင်းမှုက သိပ်မကွာခြားပါဘူး။

တကယ့် ရန်သူအစစ်က ဘယ်သူလဲ?

အပေါ်က အချက်နှစ်ချက်လုံးမှာ သတိထားရမဲ့ တကယ့်ရန်သူက Fast Charging လည်း မဟုတ်ဘူး၊ သုံးရင်းသွင်းတာလည်း မဟုတ်ပါဘူး။ “အပူချိန် (Heat)” ပါ။

ဘက်ထရီဆိုတာ ဓာတုဗေဒ ပစ္စည်းဖြစ်တဲ့အတွက် အပူကို အလွန်ကြောက်ပါတယ်။

Fast Charge သွင်းလို့ပဲဖြစ်ဖြစ်၊

ဂိမ်းဆော့ရင်း အားသွင်းလို့ပဲဖြစ်ဖြစ်၊ နေပူထဲမှာ ဖုန်းကိုထားမိလို့ပဲဖြစ်ဖြစ် ဖုန်းက အပူလွန်ကဲလာပြီဆိုရင်တော့ ဘက်ထရီ သက်တမ်းကို ထိခိုက်စေနိုင်ပါတယ်။

ဒါပေမဲ့ ခေတ်ပေါ်ဖုန်းတွေမှာ Thermal Management System တွေ ပါလာပါပြီ။ အပူချိန် တက်လာတာနဲ့အမျှ Charging Speed ကို အလိုအလျောက် လျှော့ချပစ်လိုက်ပါတယ်။ ဒါကြောင့် ဖုန်းက အရမ်းပူလာရင် အားဝင်နှေးသွားတာကို သတိထားမိကြမှာပါ။ ဒါက ဖုန်းက သူ့ကိုယ်သူ ကာကွယ်နေတာ ဖြစ်ပါတယ်။

အကြံပြုချက်

ကျွန်တော်တို့ ဖုန်းဝယ်တာက “သုံးဖို့” ဝယ်တာပါ။ “မပျက်အောင် ထိန်းသိမ်းဖို့” သက်သက် ဝယ်ထားတာ မဟုတ်ပါဘူး။ နည်းပညာကုမ္ပဏီတွေက ကျွန်တော်တို့ သက်သောင့်သက်သာ သုံးနိုင်အောင် ဖန်တီးပေးထားတာကို အရသာခံပြီး သုံးစွဲသင့်ပါတယ်။

အလျင်လိုရင် Fast Charge သုံးပါ (စိတ်ချလက်ချ သုံးပါ)။
အားသွင်းရင်း ဖုန်းပြောစရာ၊ ဂိမ်းဆော့စရာရှိရင်လည်း လုပ်ပါ (ဖုန်းအရမ်းပူမလာရင် ရပါပြီ)။
တစ်ခုပဲ ရှောင်ပါ… ဖုန်းကို အားလုံးဝကုန်တဲ့အထိ (0%) မသုံးမိပါစေနဲ့။ အဲဒါကမှ ဘက်ထရီကို ပိုထိခိုက်စေပါတယ်။

ကဲ… အခုကစပြီး ဘက်ထရီ ရာခိုင်နှုန်း လျော့မှာကြောက်တဲ့ စိတ်ရောဂါကို ဖျောက်ပြီး ဖုန်းကို စိတ်လွတ်လပ်လပ် သုံးလိုက်ကြရအောင်ဗျာ။

Source : HTX Studio