သင့်အတွေးများကို ကွန်ပျူတာ ညွှန်ကြားချက်များအဖြစ် ဘာသာပြန်ပေးနိုင်သည့် ချစ်ပ်ပြားတစ်ခု သင့်ဦးနှောက်ထဲတွင် ရှိနေပြီ။ သိပ္ပံစိတ်ကူးယဉ်ဆန်သည့်ကိစ္စ ဖြစ်နိုင်သော်ငြား နိုလန်အာဘားအတွက်မူ တကယ့်အဖြစ်မှန်ပါပင်။

လေဖြတ်ခဲ့ပြီး ၈ နှစ်အကြာ ၂၀၂၄ ခုနှစ် ဇန်နဝါရီလတွင် အသက် ၃၀ အရွယ် အာဘားသည် အမေရိကန် အာရုံကြော နည်းပညာကုမ္ပဏီ Neuralink ထံမှ ထိုကိရိယာ(ချစ်ပ်)ကို ပထမဆုံးရရှိသူ ဖြစ်လာခဲ့သည်။

၎င်းသည် ပထမဆုံးသော ချစ်ပ်တော့ မဟုတ် – အခြားကုမ္ပဏီလက်တစ်ဆုပ်စာကလည်း တီထွင် ထည့်သွင်းမှုများ ရှိခဲ့သည်။ သို့သော် Neuralink တည်ထောင်သူ အီလွန်မတ်စ်ကြောင့် နိုလန်အပေါ် အာရုံစူးစိုက်မှုကို မလွှဲမရှောင်သာ ပိုမို ဆွဲဆောင်နိုင်ခဲ့သည်။

သို့သော် နိုလန်က အရေးကြီးသည့်အရာမှာ သူရော မတ်စ်ပါ မဟုတ်ဘဲ သိပ္ပံပညာသာ ဖြစ်သည်ဟု ဆိုသည်။
သူလုပ်နေသည့်အရာများ၏ အန္တရာယ်များကို သူသိရကား- “ကောင်းလား ဆိုးလား ဘာပဲဖြစ်ဖြစ် ကျွန်တော် ကူညီမှာပါ၊
အရာအားလုံး အလုပ်ဖြစ်ရင် Neuralink မှာ ပါဝင်သူဖြစ်ဖို့အတွက် ကူညီပေးနိုင်ပါတယ်” ဟု သူက ပြောသည်။
“ကြောက်စရာကောင်းတဲ့ တစ်ခုခုဖြစ်ခဲ့ရင်လည်း အဲဒါကနေ သင်ယူရမယ်ဆိုတာ သိပါတယ်။” ဟု ဆိုသည်။

ထိန်းချုပ်မှုမရှိ ၊ ကိုယ်ရေးကိုယ်တာမရှိ
အရီဇိုးနားပြည်နယ်မှ နိုလန်သည် ၂၀၁၆ ခုနှစ်က ရေငုပ်မတော်တဆမှုတစ်ခု၌ ပခုံးအောက်မှစ၍ အကြောသေသွားခဲ့သည်။
သူ့ဒဏ်ရာက ပြင်းထန်လွန်းသဖြင့် စာကျက်ရန်၊ အလုပ်လုပ်ရန် သို့မဟုတ် ဂိမ်းများပင် မကစားနိုင်တော့မည်ကို သူ စိုးရိမ်သည်။
“ကိုယ့်မှာ ထိန်းချုပ်ခွင့်မရှိ၊ ကိုယ်ရေးကိုယ်တာ မရှိ၊ သိပ်ခက်ခဲခဲ့တယ်၊ အရာရာအတွက် တခြားလူတွေကို အားကိုးရမယ်ဆိုတာ သင်ယူရမယ်”

Neuralink ချစ်ပ်သည် သူ့စိတ်ကို ကွန်ပျူတာဖြင့် ထိန်းချုပ်နိုင်စေခြင်းကြောင့် သူ၏ ယခင်လွတ်လပ်မှု အပိုင်းတစ်ပိုင်းကို ပြန်လည်ရယူရန် ကြိုးပမ်းနိုင်ခဲ့သည်။.
ဦးနှောက်ကွန်ပျူတာကြားခံစနစ် (BCI) ဟု ခေါ်သည် – လူသားများ ရွေ့လျားရန် တွေးသည့်အခါ ထွက်လာသည့် လျှပ်စစ်စေ့ဆော်မှုများကို ထောက်လှမ်းကာ ကွန်ပျူတာမျက်နှာပြင်ပေါ်တွင် ကာဆာရွှေ့ခြင်းကဲ့သို့သော ဒစ်ဂျစ်တယ် အမိန့်ပေးချက်အဖြစ် ၎င်းတို့ကို ဘာသာပြန်ဆိုခြင်းဖြင့် အလုပ်လုပ်သည်။

၎င်းသည် သိပ္ပံပညာရှင်များ ဆယ်စုနှစ်များစွာ လုပ်ဆောင်ခဲ့သော ရှုပ်ထွေးသည့် အကြောင်းအရာတစ်ခုဖြစ်သည်။
မလွှဲမရှောင်သာဘဲ ထိုနယ်ပယ်တွင် အီလွန်မတ်စ် ပါဝင်ပတ်သက်မှုသည် နည်းပညာနှင့် နိုလန် အာဘားတို့ကို သတင်းခေါင်းစဉ်များအဖြစ်သို့ လွှမ်းမိုးသွားခဲ့သည်။

Neuralink သည် ရင်းနှီးမြှုပ်နှံမှုများစွာကို ဆွဲဆောင်ရန် ကူညီပေးသည် – လုံခြုံစိတ်ချရမှုနှင့် အလွန်အမင်း ထိုးဖောက်ဝင်ရောက်သည့် လုပ်ထုံးလုပ်နည်း၏ အရေးပါမှုတို့ကို ဆန်းစစ်ခြင်းတို့လည်း အပါအဝင် ဖြစ်သည်။

နိုလန်၏ ဦးနှောက်ချစ်ပ်ကို ကြော်ငြာသည့်အခါ”အရေးပါသည့် မှတ်တိုင်”တစ်ခုအဖြစ် ကျွမ်းကျင်သူများက ချီးကျူးကြပြီး တကယ်တမ်း အကဲဖြတ်ရန် အလွန်အချိန်ယူရလိမ့်မည်ဟု သတိပေးခဲ့သည်- အထူးသဖြင့် ၎င်းသည် သူ့ကုမ္ပဏီအတွက် လူသိရှင်ကြားထုတ်ပြန်ခြင်းကို အချိန်ယူရန် ပြောခဲ့ကြသည်။

မတ်စ်သည် ထိုအချိန်က လူမြင်ကွင်းတွင် သိုသိပ်နေခဲ့ပြီး “ကနဦးရလဒ်များက အလားအလာရှိသော နျူရွန် တံသင်း တစ်ခုကို ထောက်လှမ်းမိကြောင်း ပြသသည်” ဟု ဆိုရှယ်မီဒီယာပို့စ်တစ်ခုတွင် ရိုးရိုးရှင်းရှင်းရေးသားခဲ့သည်-
စင်စစ် ခွဲစိတ်မှုမပြီးခင်နှင့် ခွဲစိတ်မှုအပြီးတွင် သူနှင့်စကားပြောခဲ့သည့် မတ်စ်သည် ပို၍ အကောင်းမြင်သည်ဟု နိုလန်က ဆိုသည်။

“စစချင်းတုန်းကလိုပဲ သူ စိတ်လှုပ်ရှားနေတယ်လို့ ကျွန်တော် ထင်ပါတယ်” ဟု သူက ဆိုသည်။
မည်သို့ပင်ဆိုစေကာမူ Neuralink သည် ပိုင်ရှင်ဖြစ်သူ မတ်စ်ထက် ပိုမိုပတ်သက်ကြောင်း အလေးပေးပြောကြားခဲ့ပြီး ချစ်စ်ကို အီလွန်မတ်စ်၏စက်ပစ္စည်းဟု မယူဆကြောင်း ပြောသည်။
ကျန်သည့်ကမ္ဘာကကော ထိုသို့မြင်သည်လား- အထူးသဖြင့် အမေရိကန်အစိုးရတွင် မတ်စ်၏ အငြင်းပွားဖွယ်ရာ အခန်းကဏ္ဍကို အခြားကမ္ဘာ့နိုင်ငံများက မည်သို့မြင်မည်နည်း – စောင့်ကြည့်ရဦးမည် ဖြစ်သည်။

သို့သော် ကိရိယာက နိုလန်၏ ဘဝအပေါ် အကျိုးသက်ရောက်မှု ရှိသည်ကိုတော့ မေးခွန်းထုတ်စရာ မရှိပါ။

မဖြစ်နိုင်ခဲ့သည့်အရာ
နိုလန်သည် ကိရိယာကို တပ်ဆင်သည့် ခွဲစိတ်မှုမှ နိုးလာသောအခါတွင် သူသည် လက်ချောင်းများကို လှုပ်ရွရန် တွေးခြင်းဖြင့် စခရင်ပေါ်တွင် ကာဆာတစ်ခုကို ထိန်းချုပ်နိုင်ခဲ့သည်ဟု ဆိုသည်။
“ရိုးရိုးသားသားပြောရရင် ကျွန်တော် ဘာကိုမျှော်လင့်ထားမှန်းကို မသိခဲ့ပါဘူး၊ ဒါက သိပ်ကို သိပ္ပံဆန်လွန်းတာကိုး” ဟု သူက ပြောသည်။

သို့သော် စိတ်လှုပ်ရှားနေသော Neuralink ဝန်ထမ်းများ ဝန်းရံလျက် သူ၏ အာရုံကြောလှုံ့ဆော်မှုကို စခရင်ပေါ်တွင် မြင်တွေ့ပြီးနောက်တွင် ကွန်ပျူတာကို သူ့အတွေးဖြင့် ထိန်းချုပ်နိုင်စေရန် တအံ့တဩ ကြိုးပမ်းခဲ့မိသည်။
အချိန်ကြာလာသည်နှင့်အမျှ သူ၏ ဦးနှောက်ချစ်ပ်ကို အသုံးပြုနိုင်စွမ်း ပိုမိုကောင်းမွန်လာခဲ့ပြီး ယခု စစ်တုရင်နှင့် ဗီဒီယိုဂိမ်းများကို ကစားနိုင်သည့်အထိ တိုးတက်လာခဲ့သည်။
“ကျွန်တော် ဂိမ်းကစားရင်း ကြီးပြင်းလာခဲ့တာ၊ မသန်စွမ်းဖြစ်ချိန်မှာ ဒါကို စွန့်လွှတ်ခဲ့ရတယ်”ဟု သူက ထပ်လောင်းပြောသည်။

“အခု ကျွန်တော်က သူငယ်ချင်းတွေကို ဂိမ်းတွေထဲ အနိုင်ယူနေတယ်၊ ဒါက မဖြစ်နိုင်ပေမဲ့ တကယ်ဖြစ်နေပြီ”

နိုလန်သည် လူ့ဘဝများကို ပြောင်းလဲရန် နည်းပညာ၏ အလားအလာ အားကောင်းသည့် သရုပ်ပြသမှုတစ်ခု ဖြစ်သည် – သို့သော် အားနည်းချက်များလည်း ရှိနိုင်သည်။
“အဓိကပြဿနာတစ်ခုကတော့ ကိုယ်ရေးကိုယ်တာပေါ့၊ ကျွန်တော်တို့ရဲ့ ဦးနှောက်လုပ်ဆောင်ချက်ကို တင်ပို့နေတယ် ဆိုရင် ကျွန်တော်တို့ လုပ်နိုင်တာတွေကို ကြည့်ခွင့်ပေးလိုက်သလို ဖြစ်နေရုံသာမက တွေးခေါ်ပုံ၊ ယုံကြည်ချက်နဲ့ ခံစားချက်တွေကို ရသွားနိုင်မှာ” ဟု ဆားဆက်စ်တက္ကသိုလ် အာရုံကြောသိပ္ပံ ပါမောက္ခ အန်နီလ် ဆက်က ဘီဘီစီကို ပြောသည်။
“လူတစ်ယောက်ခေါင်းထဲရှိတဲ့ အရာတွေထဲ ဝင်ခွင့်ရပြီဆိုတာနဲ့၊ ပုဂ္ဂိုလ်ရေးဘဝအတွက် တခြားအတားအဆီးတစ်ခုမှ မကျန်တော့ဘူး”

၂၀၂၄ ခုနှစ် မတ်လက နိုလန်သည် X လူမှုကွန်ရက် တိုက်ရိုက်ထုတ်လွှင့်မှုတွင် သူ၏ Neuralink BCI ကို အသုံးပြု၍ အွန်လိုင်းစစ်တုရင်ဂိမ်းတစ်ခုကို ကုမ္ပဏီ၏ ဦးနှောက်ကြားခံဆော့ဖ်ဝဲမှ ဦးဆောင်ဝန်ထမ်း ဘလစ္စ ချက်မန်နှင့်အတူ ကစားပြခဲ့သည်။

သို့သော် ထိုအရာများက နိုလန်အတွက်တော့ စိုးရိမ်စရာမဟုတ် – ထိုအစား ထိုချစ်ပ်များက နောက်ထပ် ဘာလုပ်နိုင်သေးသနည်း ပိုမြင်ချင်သည်။
သူက နောက်ဆုံးတွင် သူ့ဘီးတပ်ကုလားထိုင်ကို သူထိန်းချုပ်နိုင်မည်၊ သို့မဟုတ် အနာဂတ် လူသားဆန်သည့် စက်ရုပ်ကိုပင် ထိန်းချုပ်နိုင်မည်ဟု မျှော်လင့်ကြောင်း BBC သို့ ပြောခဲ့သည်။

နည်းပညာသည် ၎င်း၏ လက်ရှိ ပိုမိုအကန့်အသတ်ရှိသည့် အခြေအနေ၌ပင် အားလုံးချောမွေ့စွာ မောင်းနှင်နိုင်ခြင်း မရှိသေးပါ။
တစ်ကြိမ်တွင် စက်ပစ္စည်းနှင့် ပတ်သက်သည့် ပြဿနာတစ်ခုကြောင့် သူ့ဦးနှောက်မှ တစ်စိတ်တစ်ပိုင်း ချိတ်ဆက်မှု ပြတ်တောက်သွားရာတွင် သူသည် ကွန်ပျူတာကို လုံးလုံးလျားလျား ထိန်းချုပ်မှု ဆုံးရှုံးစေခဲ့သည်။
“အဲဒီတုန်းက အနည်းနဲ့အများတော့ စိတ်မကောင်းဖြစ်မိတယ်၊ Neuralink ကို ဘယ်တော့မှ ပြန်သုံးနိုင်မလဲ မသိခဲ့ဘူး”

အင်ဂျင်နီယာများက ဆော့ဖ်ဝဲကို ချိန်ညှိ၍ ချိတ်ဆက်မှုကို ပြုပြင်ပြီး နောက်ပိုင်းတွင် ပိုမိုကောင်းမွန်လာသော်လည်း နည်းပညာ၏ ကန့်သတ်ချက်များနှင့် ပတ်သက်၍ ကျွမ်းကျင်သူများ မကြာခဏ ပြောလေ့ရှိသည့် စိုးရိမ်မှုကို မီးမောင်းထိုးပြခဲ့သည်။

ကြီးမားသည့်လုပ်ငန်း
Neuralink သည် ဦးနှောက်စွမ်းအားကို ဒစ်ဂျစ်တယ်နည်းဖြင့် အသုံးချနည်းကို ရှာဖွေနေသော ကုမ္ပဏီများစွာထဲမှ တစ်ခုမျှသာ။

Synchron သည်လည်း ထိုကဲ့သို့ကုမ္ပဏီတစ်ခုဖြစ်သည်။ motor neurone ရောဂါရှိသူများကို ကူညီရန် ထိုးဖောက်ခွဲစိတ်မှုနည်းပါးစွာဖြင့် သူ၏ Stentrode ကိရိယာကို ထည့်သွင်း လုပ်ဆောင်သည်။ ဦးနှောက်ဖွင့် ခွဲစိတ်မှု မလိုအပ်ဘဲ၊ ကိရိယာကို လူတစ်ဦး၏ လည်ပင်း သွေးပြန်ကြောတွင် တပ်ဆင်ထည့်သွင်းပြီးနောက် သွေးကြောမှတစ်ဆင့် ဦးနှောက်အထိ ရွေ့လျားစေသည်။
Neuralink ချစ်ပ်ကဲ့သို့ပင် ထိုကိရိယာလေးသည် နောက်ဆုံးတွင် ဦးနှောက်၏ မော်တာဧရိယာနှင့် ချိတ်ဆက်သည်။
“လူတစ်ယောက်က လက်ချောင်းကို နှိပ်မလား မနှိပ်ဘူးလား တွေးနေချိန်မှာ ဒီအတွေးကို ဖမ်းယူလိုက်ပြီး ခြားနားမှုတွေကနေ ဒစ်ဂျစ်တယ်မော်တာ ထုတ်လွှတ်မှုလို့ ခေါ်တဲ့ဟာကို ဖန်တီးလိုက်တယ်” ဟု နည်းပညာအရာရှိချုပ် ရီကီ ဘန်နာဂျီးက ရှင်းပြသည်။

၎င်းကိရိယာကို လက်ရှိလူ ၁၀ ဦး စမ်းသပ် အသုံးပြုလျက်ရှိသည်။
နောက်ဆုံးအမည် မဖော်ပြလိုသည့် မာ့ခ်ဆိုသူက သူသည် အဆိုပါကိရိယာကို Apple ၏ Vision Pro နားကြပ်ဖြင့် တွဲဖက်၍ ကမ္ဘာပေါ်တွင် ပထမဆုံးအသုံးပြုခဲ့သူဖြစ်ကြောင်း BBC သို့ ပြောကြားခဲ့သည်။
ဤအရာသည် သြစတြေးလျရှိ ရေတံခွန်များတွင် ရပ်နေခြင်းမှ နယူးဇီလန်ရှိ တောင်များကိုဖြတ်၍ လမ်းလျှောက်ခြင်းအထိ ဝေးလံသောနေရာများတွင် အားလပ်ရက် အသွင်တု ခရီးထွက်သလို ခံစားရစေသည်ဟု ဆိုသည်။
“ဒီနည်းပညာက သွက်ချာပါဒ ဝေဒနာသည်တစ်ယောက်အတွက် တကယ်ပြောင်းလဲပေးနိုင်တဲ့ အနာဂတ်ကမ္ဘာကို သွားရာလမ်း တွေ့နိုင်တာပါ” ဟု သူက ပြောသည်။

သို့သော် နိုလန်အတွက် သူ၏ Neuralink ချစ်ပ်နှင့်ပတ်သက်သည့် သတိပေးချက်တစ်ခု ရှိသည်။ ၎င်းထည့်သွင်းမှုကို ခြောက်နှစ်ကြာ လေ့လာမှုတစ်ရပ်၏ အစိတ်အပိုင်းတစ်ခုအဖြစ် သဘောတူခဲ့ပြီး ယင်းနောက် အနာဂတ်သည် မရှင်းလင်းသေးချေ။
သူ့အတွက် မည်သို့ဖြစ်လာသည်ဖြစ်စေ သူ့အတွေ့အကြုံက တစ်နေ့ တကယ်တမ်း ဖြစ်လာနိုင်သည့်အရာ၏ မျက်နှာပြင်ပေါ်မှ ခြစ်ရာမျှသာ ဖြစ်ကောင်းဖြစ်နိုင်သည်ဟု သူ ယုံကြည်သည်။
“ကျွန်တော်တို့ ဦးနှောက်အကြောင်း နည်းနည်းပါးပါး သိလာတာပေါ့၊ ဒါက လူတွေကို အများကြီး ပိုလေ့လာနိုင်စေမယ် မဟုတ်လား”

Source : bbc